بقلم/كرم من الله السيد
الوعي معناه إني حضرتك تفهم اللي بيدور حوليك بس ، تستوعب، تفكر بس شوية!
خدعة الأحزاب السياسية
المتعارف عليه في مجتمعنا بأن اللي بينضم لحزب تردد الناس بأنه قوي وصاحب نفوذ ، ويردد الجميع بأن الحزب فلان اختار فلان” دي اسمها الخدعة السمعية” يعني هو بيخدعك وبيزيف الحقيقة عندك علشان عارف إني حضرتك مش مستوعب يعني إيه حزب ودي خدعة سمعية زي الخدعة البصرية قصر عربيات أكل شرب كل دي اسمه خدعة بصرية والحقيقة” هو لا اختاره حزب ولا هو صاحب نفوذ ولا يزيد عن حضرتك أي حاجة، اه والله.
إزاي يعني مفلس وينفع أروح حزب؟
أيوه يافندم يعني حضرتك تاخد بطاقتك وفيش وتشبيه وشهادة مؤهلك وتنضم خلال ساعة إلى أي حزب دي اولاً.
ثانياً: داخل الأحزاب في لجان علي حسب مؤهلك ، خبرتك المكان اللي ترتاح فيه وتفهم فيه ، غاوي ايه؟ مثلا لجنة الاعلام ، لجنة التنمية، لجنة السياسات لجنة المراسم وبعدها تنضم للجنة اللي حضرتك عاوزها، تبقي عضو فيها ، تبقي أمين لجنة ، رئيس لجنه انت وعلاقاتك أو امكانياتك اللي هتفيد بيها الحزب مش إنت اللي هتستفاد.
هنا الفرق
بعدها ياسيدي بتطلب ورقة تثبت انضمامك للجنة دي وهووووب تنشرها علي كل اللي مش مستوعبين سياسة ، وهوووووب كلهم يقولوا واصل، وغني علشان دافع فلوس، وهوووب الصورة تتعكس عند كل الناس بإنك اختااااارك الحزب، ودي كذب وتضليل وضحك علي كل أهلنا.
أمال إيه اللي بيحصل
اختيار الحزب يعني موافقته علي النزول الفري في الانتخابات، أو القائمة ودي حكايتها حكاية هحكيها بكره أما اختيار الحزب فردي دي اللي بتقولوا عاوزين واحد يختاره حزب قوي ونوقف معاه والله دي لا يغني ولا يثمن من جوع للمرشح أصلاً. غير خداعه للناس.
لسبب واضح الأحزاب مش بدعم حد ، ولكن هو بيحصل علي الدعم من التزييف وعدم وعيك بمعني حزب ودعمه.
الحزب يفيد حضرتك في حالتين
١- عنده قاعدة شعبية كبيرة وكتلة أصوات قادرة علي تغيير مسار نجاحك في الانتخابات، والسؤال هنا اللي لازم تطرحه علشان تفوق: قولي كل الاحزاب كم عدد اعضائها في مركز دار السلام ؟ الف اتنين تلاته؟ لا والله مافيش حزب صاحب كتلة تصويتية في المركز ولا حتي مقر ولا خدمة ملوسة تأثر علي الناخب.
٢- الدعم المالي
المرشح هو اللي بيصرف علي الحزب أصلاً وعلي حملته كاملة كل اللي بيحصل عليه هو الخدعة السمعية والمفهوم بأنه واصل وصاحب نفوذ ويتردد” دي اختاره حزب ياعم ” والله لا اختاره ولا نيل الحسبه زي ما قلت لحضرتك عليها بالضبط.
اذا لا الانضمام للحزب دليل قوة ولا فكر سياسي ، ولا دليل انه تم اختياره اصلاً ولا الناس تحرق في دمها اصلي قبيلة فلان اقوي ولا عيلة فلان أعلي .
اللي بيكلم حضرتك يا فندم شارك في تأسيس الدستور نفسه وشارك في تأسيس ثلاث أحزاب سياسية وتقلد منصب نائب رئيس حزب وإلى الآن، وكنت قادر العبها علي الكل وامشي مع الماشيين عادي وازيف وأخدع الجميع لكن اقسم بالله ما اعمل كدا في يوم من الأيام وكمان علي مين علي اللي هيشيل كربي ويدفني ؟!
حجم ثروتي الحقيقي
دي رأس مالي مليارات المبادئ ومليارات القدرة علي عدم انجراري وشرائي من أحد ، أملك سبائك من الوعي والصدق والاخلاص في الكلمة والفعل، دي حقيقة ثروتي، إذا مين فينا الغني ومين فينا الفقير؟
نتكلم بكره عن الهندسة السياسية في القوائم وهترتاح مع الوعي وبس.
صحوة الوعي هتنجح زي صحوة المخدرات يقيناً.